O‘zbekistonda nafaqat avtomobillar, balki harbiy texnikalar ham yig‘iladi
O‘zbekiston Prezidenti Shavkat Mirziyoyev Nurafshon shahrida joylashgan mamlakatning eng yirik sanoat korxonalaridan biriga tashrif buyurdi.
“Nurafshon-maxsus-texnika” kompaniyasi KRANTAS brendi ostida maxsus texnika, harbiy mashinalar va turli sanoat uskunalarini ishlab chiqaradi.
Rasmiy ma’lumotlarga ko‘ra, korxonaga 1945-yilda asos solingan. 1966-yilgi vayronkor zilziladan so‘ng zavod butunlay qayta ixtisoslashtirilib, fuqarolik va sanoat qurilishi uchun po‘lat konstruksiyalar hamda yuk ko‘tarish uskunalari ishlab chiqara boshlagan. O‘zbekiston mustaqillikka erishgach, korxona ishlab chiqarish hajmini sezilarli darajada kengaytirib, xalqaro bozorga chiqdi.
Bugungi kunda KRANTAS nafaqat fuqarolik, balki zamonaviy harbiy texnikani ham loyihalashtirmoqda va ishlab chiqarmoqda. Korxona rahbariyatining ta’kidlashicha, barcha mashinalar xorijiy litsenziyalardan foydalanilmagan holda, o‘zining konstruktorlik byurosi tomonidan yaratiladi.
O‘zbekiston muhandislari tomonidan noldan yaratilgan “Tarlon” zirhli avtomobili ana shunday ishlanmalarning birinchisi bo‘ldi. Keyinchalik bu qator shahar sharoitida foydalanishga mo‘ljallangan ixchamroq “Qalqon-1” va “Qalqon-2” zirhli mashinalari bilan to‘ldirildi.
Bundan tashqari, korxona g‘ildirak formulasi 6×6 va 8×8 bo‘lgan “Arslon” zirhli transportyorlarini ishlab chiqdi. Har ikki model ham davlat sinovlaridan o‘tib bo‘lgan va yaqin orada ularni seriyali ishlab chiqarish yo‘lga qo‘yilishi mumkin.
G‘ildirak formulasi 6×6 bo‘lgan “To‘fon” o‘ziyurar artilleriya qurilmasi yana bir ishlanma bo‘ldi. U avtomatik o‘qlash tizimiga ega 155 millimetrli to‘p bilan jihozlangan bo‘lib, 50 kilometrgacha masofadagi nishonlarni yo‘q qilishga qodir. Artilleriya qurilmasi soatiga 100 kilometrgacha tezlikka erisha oladi va qariyb 600 kilometr masofani bosib o‘tadi.
Shunday qilib, O‘zbekiston sanoati nafaqat avtomobilsozlik sohasida faol rivojlanmoqda. Mamlakatimizda yengil va tijorat avtomobillarini ishlab chiqarish bilan bir qatorda, o‘z muhandislarimiz tomonidan yaratilgan zamonaviy maxsus, og‘ir va harbiy texnikalar ishlab chiqarish ham kengayib bormoqda.